بتقولوا عليها حياة !!

حسين لطفى

إزاي حياة .. وبس ؟؟

ماتقولوا دُنْيَا ياناس

لجل ماتكمل الصورة

واقْدَرْ أعيش حُزنها

ويا أفراحها

دي نَفْسِي يوم ف السَمَا

وسنين كتير مَكْسورة

يامّهْ مَاكَانش العَشَمْ

تِدَاري عني آلامها

يوم ماجِبْتيني

قولتيلي سنيورة

لا فيها صاحب يِخُون

و لا أخّ مُمْكِنْ يِفارقْ

و لا يُتْم أبويا أَدُوقهْ

و لا عِيشَهْ مَهْجُورَة

حَتّي أنتِ لَمّا رَحَلْتِ

نَسِيتِ يُومَها تقوليلي

أنكْ أَخَدّتِ مَعَاكِي

الفرحة وسبْتِ ف قلبي

النَفْس مَكْسُورة ...