ڨولك عذبني وجنوني تبغيه
مملوكه خليت في ڨلبي ماره
السهم الصياد معروف اماليه
والفاهم يقرأه من رأس الشاره
واحد ڨولو زين مرجان مواتيه
سلطان وفوق النجوم دار مناره
واحد ڨولو فض عض لامن ينهيه
تحت رماد النار ناصب صناره
وواحد بالحكمات مظفور معانيه
من زاد العقال حروفو ڨطاره
شارب من لڨديم بالغالي يشريه
في سوم الڨراح ماهيش خساره
واحد راكب طايفي جابي منهيه
معلڨلو سلوم من فوڨ ستاره
سارق ڨول الناس والتصفاڨ يجيه
يتنڨرف مڨواه محسوب شطاره
كي نعت الفكرون جلدو ما يفليه
الفريسه صوان والراس شباره
واحد راس الهم يا واش يداويه
و الحر تبكيه لحروف ازكاره
ڨولو فيه النار والدمع يطفيه
و من بعد الراحات تلهب غداره
ادفن سرك فالحفر لا من يدريه
عين الدود وما أدلش لمقاره......
شوفو وين قديت دا جني يهديه
سارح ما خلاش للجره ماره
عرج بيا فوق لمواج بجنحيه
و بحور الملحون ڨالو سحاره
الشاعر مملوك وجنونو تديه
وانا شيخه راس مالي تدباره
اللي عندو شيخ كي لقلم يبريه
وانا مالي شيخ كيف الشوعاره
قرطاسي بارود من دمي نحشيه
والبارود الحي زاد النعاره....
ڨالو عرق الڨول ورث و زادو فيه
والڨنطاس متين للبيت سماره
و انا ورث الجد صيل وعرض اتيه
وسط مراح ولاد عامر لعماره....
طيري يا حضار عدت نخاف عليه
من عين الحساد والعين مراره
والعود الضباح والسرج مواتيه
يعجبني محلاه زين التنڨاره
لوموني ياك الهوى لا لوم عليه
والعاشق مسجون روحو مكاره
نوبه تسڨيه الحلا نوبه تكويه
ومن لسع الكيات ماني صباره
عزوني واللي بلا حبيبي يبليه
رب الكون ومايصيب ليه جباره
هذا ڨولي ويا اللي معذبني بيه
ما جف الميداد من ريش حباره
.........سلمى.......
تعليقات
إرسال تعليق